ಬೆಂಗಳೂರು: ಟ್ರಾವೆಲ್ ಫುಡ್ ಸರ್ವಿಸಸ್ ಲಿಮಿಟೆಡ್ (ಟಿಎಫ್ಎಸ್) ತನ್ನ ಮೊದಲ ಸಾರ್ವಜನಿಕ ಷೇರು ನೀಡಿಕೆ (ಐಪಿಒ) ಜುಲೈ 7ರಿಂದ ಆರಂಭಿಸಿದ್ದು, ಜುಲೈ 9ರಂದು ಕೊನೆಯಾಗಲಿದೆ. ಈ ಐಪಿಒ ಎರಡು ಸಾವಿರ ಕೋಟಿ ರೂಪಾಯಿ ಮೊತ್ತದ್ದಾಗಿದ್ದು, ಕಪೂರ್ ಫ್ಯಾಮಿಲಿ ಟ್ರಸ್ಟ್ನಿಂದ ಸಂಪೂರ್ಣವಾಗಿ ಆಫರ್ ಫಾರ್ ಸೇಲ್ ಆಗಿದೆ. ಕಂಪನಿಯು ಈ ಐಪಿಒದಿಂದ ಯಾವುದೇ ನಿಧಿ ಪಡೆಯುವುದಿಲ್ಲ, ಎಲ್ಲ ಆದಾಯವು ಪ್ರಮೋಟರ್ಗೆ ಹೋಗಲಿದೆ.
ಐಪಿಒ ವಿವರಗಳು
- ಬೆಲೆ ಶ್ರೇಣಿ: ಪ್ರತಿ ಷೇರಿಗೆ 1,045ರಿಂದ 1,100 ರೂಪಾಯಿ.
- ಲಾಟ್ ಸೈಜ್: 13 ಷೇರುಗಳು
- ಒಟ್ಟು ಷೇರುಗಳು: 1.82 ಕೋಟಿ ಈಕ್ವಿಟಿ ಷೇರುಗಳು
- ಗ್ರೇ ಮಾರ್ಕೆಟ್ ಪ್ರೀಮಿಯಂ (ಜಿಎಂಪಿ): 92 ರೂಪಾಯಿ (ಜುಲೈ 3, 2025 ರಂತೆ)
- ಅಂದಾಜು ಲಿಸ್ಟಿಂಗ್ ಬೆಲೆ: 1,192 ರೂಪಾಯಿ (ಶೇ. 8.36 ಲಾಭ)
- ಲಿಸ್ಟಿಂಗ್ ದಿನಾಂಕ: ಜುಲೈ 14 (ಬಿಎಸ್ಇ ಮತ್ತು ಎನ್ಎಸ್ಇ)
ಆ್ಯಂಕರ್ ಹೂಡಿಕೆದಾರರು
ಕಂಪನಿಯು ಐಪಿಒಗೆ ಮುಂಚಿತವಾಗಿ 33 ಆ್ಯಂಕರ್ ಹೂಡಿಕೆದಾರರಿಂದ 598.8 ಕೋಟಿ ರೂಪಾಯಿ ಸಂಗ್ರಹಿಸಿದೆ. ಅದರಲ್ಲಿ ಐಸಿಐಸಿಐ ಪ್ರುಡೆನ್ಷಿಯಲ್ ಎಂಎಫ್, ಆಕ್ಸಿಸ್ ಎಂಎಫ್, ಕೊಟಕ್ ಎಂಎಫ್, ಅಬುಧಾಬಿ ಇನ್ವೆಸ್ಟ್ಮೆಂಟ್ ಅಥಾರಿಟಿ ಮತ್ತು ಫಿಡೆಲಿಟಿ ಸೇರಿವೆ.
ಹೂಡಿಕೆ ವಿವರ
ರಿಟೇಲ್ ಹೂಡಿಕೆದಾರರಿಗೆ ಒಂದು ಲಾಟ್ನ 13 ಷೇರುಗಳಿಗೆ ಕನಿಷ್ಠ 14,300 ರೂಪಾಯಿ ಹೂಡಿಕೆಯ ಅಗತ್ಯವಿದೆ. ಕಂಪನಿಯು ತನ್ನ ಉದ್ಯೋಗಿಗಳಿಗೆ 104 ರೂಪಾಯಿ ರಿಯಾಯಿತಿ ನೀಡುತ್ತಿದೆ. ಕೊಟಕ್ ಮಹೀಂದ್ರ ಕ್ಯಾಪಿಟಲ್ ಕಂಪನಿ, ಎಚ್ಎಸ್ಬಿಸಿ ಸೆಕ್ಯುರಿಟೀಸ್, ಐಸಿಐಸಿಐ ಸೆಕ್ಯುರಿಟೀಸ್ ಮತ್ತು ಬಾಟ್ಲಿವಾಲಾ & ಕರಣಿ ಸೆಕ್ಯುರಿಟೀಸ್ ಈ ಐಪಿಒದ ಬುಕ್-ರನ್ನಿಂಗ್ ಲೀಡ್ ಮ್ಯಾನೇಜರ್ಗಳಾಗಿವೆ.
ಹೂಡಿಕೆ ಮಾಡಬೇಕೇ?
ಕಂಪನಿಯು ಭಾರತದ ವಿಮಾನ ನಿಲ್ದಾಣ ಎಫ್ & ಬಿ ಮಾರುಕಟ್ಟೆಯಲ್ಲಿ ಪ್ರಮುಖ ಸ್ಥಾನವನ್ನು ಹೊಂದಿದೆ, ಆದರೆ ಶೇ.86-90 ಆದಾಯವು ಕೇವಲ ಐದು ವಿಮಾನ ನಿಲ್ದಾಣಗಳಿಂದ ಬರುತ್ತದೆ, ಇದು ಕಾಂಟ್ರಾಕ್ಟ್ ನವೀಕರಣದ ಮೇಲೆ ಅವಲಂಬಿತವಾಗಿದೆ. ಹೂಡಿಕೆದಾರರು ಕಂಪನಿಯ ಆರ್ಥಿಕ ಸ್ಥಿತಿ, ಮಾರುಕಟ್ಟೆ ಸ್ಪರ್ಧೆ ಮತ್ತು ಜಿಎಂಪಿ ಆಧಾರದ ಮೇಲೆ ತಮ್ಮ ನಿರ್ಧಾರವನ್ನು ತೆಗೆದುಕೊಳ್ಳಬಹುದು.
ಟ್ರಾವೆಲ್ ಫುಡ್ ಸರ್ವೀಸಸ್ ಲಿಮಿಟೆಡ್ ಕಂಪನಿ ಹಿನ್ನೆಲೆ
ಟ್ರಾವೆಲ್ ಫುಡ್ ಸರ್ವೀಸಸ್ ಲಿಮಿಟೆಡ್ (ಟಿಎಫ್ಎಸ್) ಮುಂಬೈ ಮೂಲದ ಕಂಪನಿಯಾಗಿದ್ದು, 2009ರಲ್ಲಿ ಸ್ಥಾಪನೆಯಾಗಿದೆ. ಇದು ಭಾರತ ಮತ್ತು ಮಲೇಷ್ಯಾದ ವಿಮಾನ ನಿಲ್ದಾಣಗಳಲ್ಲಿ ಕ್ವಿಕ್-ಸರ್ವೀಸ್ ರೆಸ್ಟೋರೆಂಟ್ಗಳು (ಕ್ಯೂಎಸ್ಆರ್), ಫುಡ್ ಕೋರ್ಟ್ಗಳು, ಲೌಂಜ್ಗಳು ಮತ್ತು ಇತರ ಆಹಾರ ಮತ್ತು ಪಾನೀಯ (ಎಫ್ & ಬಿ) ಸೇವೆಗಳನ್ನು ನಿರ್ವಹಿಸುತ್ತದೆ. ಕಂಪನಿಯು ಭಾರತದ ವಿಮಾನ ನಿಲ್ದಾಣ ಎಫ್ & ಬಿ ವಿಭಾಗದಲ್ಲಿ ಪ್ರಮುಖ ಸ್ಥಾನ ಹೊಂದಿದ್ದು, ಕ್ಯೂಎಸ್ಆರ್ ವಿಭಾಗದಲ್ಲಿ ಶೇ.26 ಮತ್ತು ಲೌಂಜ್ ವಿಭಾಗದಲ್ಲಿ ಶೇ.45 ಮಾರುಕಟ್ಟೆ ಪಾಲನ್ನು ಹೊಂದಿದೆ.
ಕಾರ್ಯಾಚರಣೆ: ಟಿಎಫ್ಎಸ್ ಭಾರತದ 20 ವಿಮಾನ ನಿಲ್ದಾಣಗಳಲ್ಲಿ ಮುನ್ನೂರಕ್ಕೂ ಅಧಿಕ ಔಟ್ಲೆಟ್ಗಳನ್ನು ನಿರ್ವಹಿಸುತ್ತದೆ. ಇದರಲ್ಲಿ ದೆಹಲಿ, ಮುಂಬೈ, ಬೆಂಗಳೂರು, ಚೆನ್ನೈ ಮತ್ತು ಕೋಲ್ಕತದಂತಹ ಪ್ರಮುಖ ವಿಮಾನ ನಿಲ್ದಾಣಗಳು ಸೇರಿವೆ.
ಇದು ಡೊಮಿನೋಸ್, ಬರ್ಗರ್ ಕಿಂಗ್, ಸ್ಟಾರ್ಬಕ್ಸ್ ಮತ್ತು ಇತರ ಜಾಗತಿಕ ಬ್ರಾಂಡ್ಗಳೊಂದಿಗೆ ಸಹಭಾಗಿತ್ವ ಹೊಂದಿದೆ, ಜೊತೆಗೆ ಸ್ವಂತ ಬ್ರಾಂಡ್ಗಳಾದ ಬಿಂಗ್ ಮತ್ತು ಫುಡೀಸ್ ಸಹ ನಡೆಸುತ್ತದೆ. ಕಂಪನಿಯ ಆದಾಯದ ಶೇ.86-90 ಇದ್ದು, ಐದು ಪ್ರಮುಖ ವಿಮಾನ ನಿಲ್ದಾಣಗಳಿಂದ ಬರುತ್ತದೆ. ಅಲ್ಲದೇ ಈ ಆದಾಯ ಕಾಂಟ್ರಾಕ್ಟ್ ನವೀಕರಣದ ಮೇಲೆ ಅವಲಂಬಿತವಾಗಿದೆ.
ಆರ್ಥಿಕ ಸ್ಥಿತಿ: 2024-25ರ ಆರ್ಥಿಕ ವರ್ಷದಲ್ಲಿ ಟಿಎಫ್ಎಸ್ ಒಟ್ಟು 1,762.71 ಕೋಟಿ ರೂಪಾಯಿ ಆದಾಯ ಗಳಿಸಿದ್ದು, ವಾರ್ಷಿಕ ಶೇ.21 ಬೆಳವಣಿಗೆ ದಾಖಲಿಸಿದೆ.
ಲಾಭ: ಅಂದಾಜು 363 ಕೋಟಿ ರೂಪಾಯಿ ಲಾಭ ಹೊಂದಿರುವ ಈ ಕಂಪನಿ ತನ್ನ ಆದಾಯದ ಬಹುಪಾಲು ಕ್ಯೂಎಸ್ಆರ್ (ಶೇ.50) ಮತ್ತು ಲೌಂಜ್ ಸೇವೆಗಳಿಂದ (ಶೇ.40) ಗಳಿಸುತ್ತದೆ.
ವಿಶೇಷತೆ: ಟಿಎಫ್ಎಸ್ ಭಾರತದ ವೇಗವಾಗಿ ಬೆಳೆಯುತ್ತಿರುವ ವಿಮಾನಯಾನ ಮಾರುಕಟ್ಟೆಯ ಲಾಭ ಪಡೆಯುತ್ತಿದ್ದು, ದೇಶದ ವಿಮಾನ ನಿಲ್ದಾಣಗಳಲ್ಲಿ ಪ್ರಯಾಣಿಕರ ಸಂಖ್ಯೆಯ ಏರಿಕೆಯಿಂದ ಉತ್ತೇಜನ ಪಡೆದಿದೆ. ಆದರೆ, ಕಾಂಟ್ರಾಕ್ಟ್ಗಳ ಅವಧಿ ಮೇಲಿನ ಅವಲಂಬನೆ ಮತ್ತು ಸ್ಪರ್ಧೆಯು ಕಂಪನಿಯ ಮುಂದಿನ ಸವಾಲಾಗಿದೆ.
ಸೂಚನೆ: ಷೇರು ಮಾರುಕಟ್ಟೆ ಲಾಭ ಏರಿಳಿತ ಹಾಗೂ ಅನಿಶ್ಚಿತತೆಯಿಂದ ಕೂಡಿದ್ದು, ಯಾವುದನ್ನೂ ಇದಮಿತ್ಥಂ ಎಂದು ಖಚಿತವಾಗಿ ಹೇಳಲಾಗದು. ಇದು ಆಸಕ್ತರಿಗೆ ಹೋಟೆಲ್ ಕನ್ನಡ.ಕಾಂ ನೀಡುವ ಮಾಹಿತಿಯೇ ಹೊರತು ಶಿಫಾರಸು ಅಲ್ಲ. ಹೂಡಿಕೆದಾರರು ಪರಿಣತರ ಸಲಹೆ ಹಾಗೂ ಸ್ವಂತ ಅಧ್ಯಯನ ಮತ್ತು ವಿವೇಚನೆಯಿಂದ ಹೂಡಿಕೆ ಮಾಡಬೇಕು.
ಇದೂ ಓದಿ: ದಿಗ್ಗಜ ಹೋಟೆಲಿಗರಿಗೂ ತಿಳಿಯಲಾಗಲಿಲ್ಲ ಇದೊಂದು ರಹಸ್ಯ!; ಕೆಲವು ಹೋಟೆಲ್ಗಳಲ್ಲಿದೆಯಾ ‘ಸ್ಥಳ ಮಹಿಮೆʼ?
ಇದೂ ಓದಿ: ಹೋಟೆಲಿಗರಿಗೆ ಸಮಸ್ಯೆ ಆದಾಗ ನಾವಿದ್ದೇವೆ: ಬಿಎಚ್ಎ ನೂತನ ಅಧ್ಯಕ್ಷ ಎಚ್.ಎಸ್. ಸುಬ್ರಹ್ಮಣ್ಯ ಹೊಳ್ಳ
ಇದೂ ಓದಿ: ಬೆಂಗಳೂರು ಹೋಟೆಲುಗಳ ಸಂಘದ ಸದಸ್ಯತ್ವ ಪಡೆಯುವುದು ಹೇಗೆ? ಅದಕ್ಕೆಂದೇ ಮಾಡಲಾಗಿದೆ ಹೊಸ ಸಮಿತಿ
