ಸಂತ: ಓಯ್ ಚಾಯ್
ಕಾಂತ: ಹಾಯ್ ಹಾಯ್
ಸಂತ: ಓ ಸ್ಸಾರಿ, ನೀನು ಚಾಯ್ ಬಗ್ಗೆ ಬರ್ದಿದ್ನೆಲ್ಲ ಓದಿ ಓದಿ ಹಾಯ್ ಅನ್ನೋವಾಗ್ಲೂ ಬಾಯಿಗೆ ಚಾಯ್ ಬಂದ್ಬಿಡ್ತು.
ಕಾಂತ: ಓಹ್.. ಹೌದಾ.. ಪರ್ವಾಗಿಲ್ಲ.
ಸಂತ: ಅದ್ಸರಿ, ಏನು ಬಹಳ ಖುಷಿಯಾಗಿದಿ ? ಸಂಬಳ ಆಯ್ತಾ ?
ಕಾಂತ: ಹೌದು ಆಯ್ತು, ಸಂಬಳ ಬಗ್ಗೆ ಮಾತಾಡೋ ಹಾಗೇ ಇಲ್ಲ, ನಂ ಕಂಪನೀಲಿ ಒಂದನೇ ತಾರೀಕು ಸರಿಯಾಗಿ ತಪ್ಪದೇ ಸಂಬಳ ಹಾಕ್ಬಿಡ್ತಾರೆ. ಆದರೆ..
ಸಂತ: ಆದರೆ ಏನು ?
ಕಾಂತ: ಸಂಬಳ ತಗೊಳೋರ್ ಕಥೆ ಏನ್ ಕೇಳ್ತೀಯಾ..!
ಸಂತ: ಏನಪ್ಪ ಅಂಥ ಕಥೆ..!!!
ಕಾಂತ: ಅದೇ ಗುರು.. ಹೇಗೆ ಹೇಳೋದು ಅಂತ.
ಸಂತ: ಒಂದ್ ಕೆಲಸ ಮಾಡು. ನೀನು ನಿನ್ನ ‘ಚಾಯ್’ ಸ್ಟೈಲ್ನಲ್ಲಿ ಕಥೆ ಹೇಳು.
ಕಾಂತ: ಹಾಗಾದ್ರೆ ಹೇಳೋದ್ ಸುಲಭ.
ಸಂತ: ಸರಿ ಹೇಳು ಮತ್ತೆ..
ಕಾಂತ: ಸಂಬಳ ಬಂದ ಮೊದಲೆರಡು ದಿನ ನಮ್ ಕಥೆ ಗಟ್ಟಿ ಮಸಾಲಾ ಟೀ. ಅಂದರೆ ನೀರು ಬೆರೆಸದ ಗಟ್ಟಿ ಹಾಲು, ಜೊತೆಗೆ ರುಚಿಗೆ ಏಲಕ್ಕಿ-ಶುಂಠಿ.
ಸಂತ: ಓಹ್ ..ಯಮ್ಮೀ..ಆಮೇಲೆ ?
ಕಾಂತ: ಆಮೇಲೆ ಮೂರ್ನಾಲ್ಕು ದಿನ ಏಲಕ್ಕಿ-ಶುಂಠಿ ಹಾಕಲ್ಲ. ಬರೀ ಗಟ್ಟಿ ಟೀ.
ಸಂತ: ಇದು ಒಂದು ವಾರದ ಕಥೆ. ಅದಾದ್ಮೇಲೆ?
ಕಾಂತ: ಎರಡನೇ ವಾರ ಒಂದು ಲೋಟ ಹಾಲಿಗೆ ಅರ್ಧ ಲೋಟ ನೀರು ಬೆರೆಸಿದ ಟೀ.
ಸಂತ: ಇದೊಂದ್ ಮೂರ್ನಾಲ್ಕು ದಿನನಾ?
ಕಾಂತ: ಹೌದು .. ಆಮೇಲೆ ಮೂರ್ನಾಲ್ಕು ದಿನ, ಒಂದು ಲೋಟ ಹಾಲಿಗೆ ಒಂದು ಲೋಟ ನೀರು ಬೆರೆಸಿದ ಟೀ.
ಸಂತ: ಆಗಲೂ ಟೀ ಟೇಸ್ಟಿರುತ್ತಾ?
ಕಾಂತ: ಹೌದು..
ಸಂತ: ಸರಿ, ಆಮೇಲೆ..?
ಕಾಂತ: ಮೂರನೇ ವಾರ ಹಾಲು ಹಾಕಲ್ಲ, ಬ್ಲ್ಯಾಕ್ ಟೀ ..
ಸಂತ: ಆಮೇಲೆ ?
ಕಾಂತ: ಮೂರನೇ ವಾರ ಮುಗೀತಿದ್ ಹಾಗೇ ಬರೀ ಟೀ, ಸಕ್ಕರೆ ಕೂಡ ಹಾಕಲ್ಲ.
ಸಂತ: ಓಹ್, ಸಪ್ಪೆ ಅನ್ಸಲ್ವಾ?
ಕಾಂತ: ಇಲ್ಲ, ಟೀ ಗುಣವೇ ಅದು, ಸಕ್ಕರೆ ಇಲ್ಲದೆಯೂ ಅಕ್ಕರೆಯಿಂದ ಕುಡಿತೇವೆ.
ಸಂತ: ಮತ್ತೆ ಕೊನೇ ವಾರ ಏನ್ ಕಥೆ?
ಕಾಂತ: ಅದಿನ್ನೂ ಮಜಾ. ಬಿಸಿಬಿಸಿ ನೀರಿಗೆ ಒಂದ್ ಟೀ ಬ್ಯಾಗ್ ಹಾಕೊಂಡು ಹಾಗೆ ಕುಡಿಯೋದು. ಹಾಲು- ಸಕ್ಕರೆ ಏನೂ ಇರಲ್ಲ. ಏಕೆಂದರೆ ಮಂಥೆಂಡ್ ಫುಲ್ ಟೈಟ್, ಅದ್ಕೆ.
ಸಂತ: ಆದ್ರೂ ಟೀ ಖುಷಿ ಕೊಡುತ್ತಾ?
ಕಾಂತ: ಒಮ್ಮೆ ಅದಕ್ಕೆ ಅಡಿಕ್ಟ್ ಆದ್ರೆ ಹಾಗೇ, ಹೇಗಿದ್ರೂ ಖುಷಿ ಕೊಡುತ್ತೆ. ತಿಂಗಳ ಕೊನೆಯಲ್ಲಿ ಸ್ವಲ್ಪ ಒಗರೊಗರು ಅನಿಸಬಹುದು. ಆಗ ಆರೋಗ್ಯಕ್ಕೆ ಒಳ್ಳೇದು ಅಂದ್ಕೊಂಡು ಚಪ್ಪರಿಸಿ ಕುಡಿಯೋದು.
ಸಂತ: ವಾಹ್.. ಟೀ ಕಥೆ ಚೆನ್ನಾಗಿದೆ. ಇದು ಬರೀ ಕಥೆನಾ ಅಥವಾ ಏನಾದ್ರೂ ನೀತಿ ಇದ್ಯಾ ಇದ್ರಲ್ಲಿ?
ಕಾಂತ: ನೀತಿ ಏನು, ಅದೇ ತಿಂಗಳ ಆರಂಭದಿಂದ ಕೊನೆಯವರೆಗೂ ಏನಾದ್ರೂ ಚಹಾ ಹೀರುವ ಖುಷಿ ಕಳೆದುಕೊಳ್ಳಬಾರದು ಅಂತ ಅಂದ್ಕೊಬಹುದು.
ಸಂತ: ಅಂದ್ಕೊಳ್ಳೋದೆಲ್ಲ ಏನೂ ಬೇಡ. ಕಾಂತ, ನೀನೇನೂಂತ ನಂಗೊತ್ತು, ಹೇಳು.. ಈ ಚಹಾ ಕಥೆಯ ನೀತಿ ಏನು..?
ಕಾಂತ: ಹೇಳಲೇಬೇಕಾ ?
ಸಂತ: ಎಸ್.. ಇಲ್ಲಂದ್ರೆ ಟೀ ಮೇಲಾಣೆ ..😜
ಕಾಂತ: ಅಯ್ಯೋ, ಹಾಗಾದ್ರೆ ಹೇಳ್ತೀನಿ ಕೇಳು.
ಸಂತ: ಹಾಗ್ ಬಾ ದಾರಿಗೆ..😜
ಕಾಂತ: ಈ ತಿಂಗಳು ಅನ್ನೋದು ನಮ್ ಇಡೀ ಬದುಕಿನ ಥರ. ಈ ಹಾಲು, ಏಲಕ್ಕಿ, ಶುಂಠಿ, ಸಕ್ಕರೆ ಎಲ್ಲ ಬದುಕಿನಲ್ಲಿ ಸಿಗುವ ಸುಖ-ಸವಲತ್ತುಗಳು. ಈ ಚಹಾ ಅನ್ನೋದು ನಮ್ಮ ಮನಸ್ಥಿತಿ, ನಾವ್ ಬದುಕೋ ರೀತಿ. ಸುಖ ಇರಲಿ, ಇಲ್ಲದಿರಲಿ, ನಾವು ನಮ್ಮ ಬದುಕನ್ನು ಆಸ್ವಾದಿಸುತ್ತಲೇ ಇರಬೇಕು, ನಮ್ಮ ಮನಸ್ಥಿತಿ ಸ್ಥಿರವಾಗಿರಬೇಕು.
ಸಂತ: ಗುರು ಸಿಂಪಲ್ಲಾಗ್ ಹೇಳ್ ಗುರು.
ಕಾಂತ: ಸಿಂಪಲ್ಲಾಗ್ ಹೇಳ್ಬೇಕಂದ್ರೆ, ‘ಎಲ್ಲ ಇಲ್ಲಗಳ ನಡುವೆಯೂ ಇರುವುದನ್ನು ಆಸ್ವಾದಿಸಬೇಕು, ಅನುಭವಿಸಬೇಕು ಅಷ್ಟೇ .. ಅದೇ ಬ್ಲ್ಯಾಕ್ ಟೀ ಥರ..’😜
©#ಕಾಂತೋಪಖ್ಯಾನ
