ಬೆಂಗಳೂರು: ಇನ್ನುಮುಂದೆ ಊರು-ಕೇರಿ, ಗಲ್ಲಿ-ಗಲ್ಲಿಗಳಲ್ಲೂ ಬೊಂಬಾಟ್ ಭೋಜನ ಸಿಗಲಿದೆ. ಹೌದು.. ನಿಮ್ಮದೇ ಊರಿನ, ಕೇರಿಯ, ಗಲ್ಲಿಯಲ್ಲೂ ಬೊಂಬಾಟ್ ಭೋಜನ ತಯಾರಿ ತಿಳಿಯುವ ಜೊತೆಗೆ ಅದರ ಸವಿ ಸವಿಯುವ ಅವಕಾಶವೂ ಲಭ್ಯವಾಗಲಿದೆ. ಮಾತ್ರವಲ್ಲ, ರಾಜ್ಯದ ಹಳೆಯ ಹಾಗೂ ಜನಪ್ರಿಯ ಹೋಟೆಲ್‌ಗಳ ಪರಿಚಯ, ಅಲ್ಲಿನ ವೈಶಿಷ್ಟ್ಯಗಳ ಅನಾವರಣವೂ ಆಗಲಿದೆ.
ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಇದೇ ಸೋಮವಾರದಿಂದ ನಿತ್ಯ ಮಧ್ಯಾಹ್ನ 12 ಗಂಟೆಗೆ ಪ್ರಸಾರ ಆಗಲಿರುವ ʼಬೊಂಬಾಟ್ ಭೋಜನ – ಸೀಸನ್ 5ʼ ಇದಕ್ಕೆ ವೇದಿಕೆ ಒದಗಿಸಲಿದೆ. ಈ ಮೂಲಕ ಹೊಸ ಸೀಸನ್ ಇನ್ನಷ್ಟು ಹೊಸತನದೊಂದಿಗೆ ನಿಮ್ಮ ಕಣ್ಮುಂದೆ ಬರಲಿದೆ..
ಕನ್ನಡ ಕಿರುತೆರೆಯಲ್ಲಿ ಅಡುಗೆ ಶೋ ಅಂದ್ರೆ ಥಟ್ಟನೆ ನೆನಪಾಗೋದೇ ಸ್ಟಾರ್ ಸುವರ್ಣ ವಾಹಿನಿಯ ‘ಬೊಂಬಾಟ್ ಭೋಜನ’. ಸಾವಿರಕ್ಕೂ ಹೆಚ್ಚು ಸಂಚಿಕೆಗಳನ್ನು ದಾಟಿ ಹೊಸ ಮೈಲಿಗಲ್ಲು ಸೃಷ್ಟಿಸಿರುವ ಈ ಶೋ ಈಗಾಗಲೇ 4 ಸೀಸನ್ ಗಳನ್ನು ಯಶಸ್ವಿ ಆಗಿ ಪೂರೈಸಿದೆ. ಇದೀಗ ಇನ್ನಷ್ಟು ಹೊಸತನ ಅಳವಡಿಸಿಕೊಂಡು 5ನೇ ಆವೃತ್ತಿ ವೀಕ್ಷಕರ ಮುಂದೆ ಬರಲು ಸಜ್ಜಾಗಿದೆ.
ಈ ಬಾರಿ ‘ಬೊಂಬಾಟ್ ಭೋಜನ ಸೀಸನ್ 5’ ರ ಪ್ರಮುಖ ವಿಶೇಷತೆಯಂದ್ರೆ “ಬೊಂಬಾಟ್ ಭೋಜನ On Wheels”. ಇನ್ಮುಂದೆ ಬೊಂಬಾಟ್ ಭೋಜನದ ಗಾಡಿ ರಾಜ್ಯಾದ್ಯಂತ ಸಂಚರಿಸಿ ನಿಮ್ಮ ಊರಿಗೆ, ನಿಮ್ಮ ಕೇರಿಗೆ, ನಿಮ್ಮ ಗಲ್ಲಿಗಳಿಗೆ ಬಂದು ರುಚಿ ರುಚಿಯಾದ ಅಡುಗೆ ತಯಾರಿಸಿ ಆ ರುಚಿಯನ್ನು ನಿಮಗೆ ತಿಳಿಸಿಕೊಡಲಿದೆ. ಇದು ಈ ಸೀಸನ್ ನ ಮುಖ್ಯ ಆಕರ್ಷಣೆ.
ಈ ಸೀಸನ್ ಇನ್ನಷ್ಟು ವಿಶೇಷಗಳು..
- ಸ್ಪೆಷಲ್ ಊಟ: ಸಿಹಿ-ಕಹಿ ಚಂದ್ರು ಅವರು ರುಚಿ-ರುಚಿ ಆದ ಅಡುಗೆ ತಿಳಿಸುತ್ತಾರೆ.
- ಹೋಟೆಲ್ ಊಟ: ಕರ್ನಾಟಕದಾದ್ಯಂತ ಚಲಿಸಿ, ಜನಪ್ರಿಯತೆ ಗಳಿಸಿರುವ, ವರ್ಷಗಳ ಇತಿಹಾಸವಿರುವ ಹೋಟೆಲ್‌ಗಳಿಗೆ ಧಾವಿಸಿ ಅಲ್ಲಿನ ಜನಪ್ರಿಯ ತಿನಿಸುಗಳನ್ನು ಸವಿದು ಜನರಿಗೆ ತಿಳಿಸುವುದು.
- ಊಟ ರೆಡಿ: ಜನಸಾಮಾನ್ಯರು/ಸೆಲೆಬ್ರಿಟಿಗಳು ಬಂದು ವಿವಿಧ ರೀತಿಯ ಕೈರುಚಿ ತಿಳಿಸುವುದು.
- ಆರೋಗ್ಯ ಅಡುಗೆ: ಡಾ.ಗೌರಿ ಸುಬ್ರಹ್ಮಣ್ಯ ಅವರು ಜನರಿಗೆ ಉಪಯುಕ್ತವಾದ ಮನೆಮದ್ದನ್ನು ತಿಳಿಸುತ್ತಾರೆ.
- ಸವಿಯೂಟ : ಬೇರೆ ಬೇರೆ ಜಿಲ್ಲೆಗಳಲ್ಲಿರುವ ಲೇಡೀಸ್ ಕ್ಲಬ್‌ಗಳಿಗೆ ಹೋಗಿ ಅಲ್ಲಿನ ಜನರೊಂದಿಗೆ ಬೆರೆತು, ಅಡುಗೆ ಮಾಂತ್ರಿಕ ಸಿಹಿ-ಕಹಿ ಚಂದ್ರು ಅವರು ವಿಭಿನ್ನ ತಿಂಡಿ-ತಿನಿಸು ತಯಾರಿಸುತ್ತಾರೆ.
ಇದೆಲ್ಲದರ ಜೊತೆಗೆ ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಇದೇ ಮೊದಲ ಬಾರಿಗೆ ಪ್ರತಿ ಶನಿವಾರ ಮಾಂಸಪ್ರಿಯರಿಗಾಗಿ ಸಿದ್ಧವಾಗ್ತಿದೆ ‘ಬೊಂಬಾಟ್ ಬಾಡೂಟ’. ಅಡುಗೆ ಮಾಂತ್ರಿಕ ಆದರ್ಶ್ ತಟಪತಿ ಈ ಕಾರ್ಯಕ್ರಮ ನಡೆಸಿಕೊಡಲಿದ್ದಾರೆ. ಇದರಲ್ಲಿ ಖಾರ ಮಸಾಲಾ, ಮಿರ್ಚಿ ಮಸಾಲಾ ಹಾಗೂ ನಾಟಿ ಮಸಾಲಾ ಎಂಬ ವಿಭಾಗಗಳು ಇರುತ್ತವೆ.
ನಳ ಮಹಾರಾಜ ಸಿಹಿ-ಕಹಿ ಚಂದ್ರು ಅವರ ನೇತೃತ್ವದಲ್ಲಿ ಶುರು ಆಗುತ್ತಿರುವ ‘ಬೊಂಬಾಟ್ ಭೋಜನ ಸೀಸನ್ 5’ ಇದೇ ಸೋಮವಾರದಿಂದ ಮಧ್ಯಾಹ್ನ 12 ಗಂಟೆಗೆ ನಿಮ್ಮ ನೆಚ್ಚಿನ ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾಗಲಿದೆ.
ಇದೂ ಓದಿ: ಹೋಟೆಲಿಗರೇ ಹುಷಾರು: ದಸರಾ-ದೀಪಾವಳಿ ಹಿನ್ನೆಲೆಯಲ್ಲಿ ಎಫ್‌ಎಸ್‌ಎಸ್‌ಎಐ ಹೊರಡಿಸಿದೆ ಹೊಸ ಆದೇಶ
ಇದೂ ಓದಿ: ಬೆಂಗಳೂರಿನ ಟೀ ಸ್ಟಾಲ್ ಮಾಲೀಕರ ಪತ್ನಿ ಖಾತೆಗೆ ಜಮಾ ಆಯ್ತು 999 ಕೋಟಿ ರೂಪಾಯಿ!; ಪತಿಗೀಗ ಭಾರಿ ಫಜೀತಿ
ಇದೂ ಓದಿ:ಬೆಂಗಳೂರು ಹೋಟೆಲುಗಳ ಸಂಘದ ಸದಸ್ಯತ್ವ ಪಡೆಯುವುದು ಹೇಗೆ? ಅದಕ್ಕೆಂದೇ ಮಾಡಲಾಗಿದೆ ಹೊಸ ಸಮಿತಿ
